Ano Baya Talaga?

pila kaining makilimos poon kan ako magka-isip

sa luwas kan samong harong pirmi na nasisi'rip

nagkamang pa sana kaito, dai pa nakakalakaw

...daing patod kada byernes sakong pigtatanaw

lumbod na isip nagbungkaras ining hapot: t'daw

makahirakon hilingon, baang gabat para isipon

pero sa kahaluyan sa iba pang kasibutan nalingaw

ordinaryo na ni, nagin garo maogmang pagtiripon

naghaloy, nag-adal, bigla nag-aru'al, actibista daa

pero yaon giraray, dai nagli'pot, logod naglaba pa

ining makilimos byernes sa pwerta, yaon pa an pila

kun sain nagpoon su gamot magharanap daw kita

napamurongtan, nabirikan ining gobyernong korupto

taas kamo-o sabay kaining grupo, tundag: sa presinto!

pagpara-hara-hapihap laom kan rehas, sa sadiri nahirak

igwang nagliwanag, ining dalan palan grabe, lubak-lubak!

iyo baga ini totoong dalan sa gamot kaining kasakitan?

mga nagpalimos, panahon pa kan biblia, yaon, dakul man

tibaad bako man ining gobyerno demokrasya an hinalian?

tibaad an lyabe yaon sa mga tawong kani nagpadalagan

dating mayaman, nagkandidato, sa eleksyon nanggana

kadakul nakatuhkaw ginamit an pwesto yuminaman sana

maski arin man herederong yaman o hina'basan pareho

sumada: dai ninda aram obligasyon kan igwang sentimo

yaon sa libro nabasa 'responsibilities of wealth' kun sain

lingaw na. paminsan-minsan maginvest man daing kabain

magtao ki serbisyong puro. Profit with honor, SMC ni Soriano

ano daw kun ngonian kun eu pa man palakad ni Cojuangco.

kun siring gamot kaning pagpalimos, pag-tios, dai makukua

an nasa pwesto, bakong man gabos gahaman sa kwarta

kudi sa may kaya, hina'bun o pigamana, pareho man sinda

igwang responsibilidad na an pagtios tabangan mapara na

Hain daw sinda, ining iri-igwahon, mayamanon, may kaya

udok sa boot, boluntaryong ma-heras, saindang ganansya

tinambakan ki grasya na kan sa ITAAS sinda pinasubli sana

pirang pang Manny Pacquiao kaipuhan an Pinas magkaigwa?

--

Hali ki Ben Bobis (15 Nov 2010)