an tula

.
pa'no naging tula? kadalasan sa lagatik, maski mayo ki kuwit, buda sa tanog na gari nagpaparagubdob sa laog. Bilanga an silaba, sundi man an rima. pa'no pinutol, susoga an sukol...

kadakol ki mga tataramon na naghihidaw sa himate buda ideya, kundi an poeta na kugos kan tema, nalalapag an mga iyan na naghihidaw, ngani mabilog an mawot sabihon sa pagkadakop sainda sa sinusurat na rawitdawit man o osipon.

pa'no pag dae masukol an mga linya? bako sa dae tatao an masukol, ni bako ta kulang o sobra sa pangaipo, kundi ta nagdudulag an linya sa pagsukol ta ngani ini magin kun ano siya.

bako sa kakulangan ki tataramon kun nata iyo an ginagamit, kundi sa pangyari kan sintesis na hale sa mga bagay na bako sanang kaagid, kundi nagpapaguiromdom, kan himate kan boot, kan ideya, asin tinutubod kan tataramon,

sagkod na magibo na itong dae, maging iyo, sosog sa kun ano an iyo, ta ngani an nagbabasa, an naghihinanyog, biyo man magtubod, mamatean itong paghimate kan boot, asin makua an ideyang boot saiya maipaabot.

dae natatapos sa pag-aagid. dae natatapos sa metapora. maski sa metonomy o synechdoche, o kun anu pa man na taktika na kaito pa nangaranan na.

labi pa sa porma, labi pa sa rima, labi pa sa sukol na nagpupugol, orog labi sa tataramon na nagkukulong digdi.

an tula, iyo.